Siaam nafue hao?
Akofng zhoa aswn qix au hoehngg tittooi. Hitee sizun dwhoir si Go Lak gueh, dngf joah ee sizun, hoehngg lai hofng bibiar zhuef, di chiuxar defngtaau toaan laai cit zun cit zun liauliang ee sviaym. Yn sunar tviaf dioih doi mng yn akofng:
“Akofng! Akofng! Hef si svaq deq hao?”
Yn akofng doi korng: “Aa, hef siaam deq hao lax!”
(siaam: cit ciorng quntaang, ma u laang korng si sieen, di goarn kahiofng lorng kioix y si siaam.)
Sunar koiq mng: “Siaam booi zhuix nafue hao?”
Yn akofng doi korng: “Zaai hao lax!”
“Ah, mohe u zaai doi be hao?”
Akofng ixn y korng: “Hef zuydea mih bueq nafue hao.”
Sunar doi korng: “Iafbooi zuykef zuydea mih doi ue hao?”
Akofng korng: “A mxzay hef zhuix hiaq qoaq.”
“Booi, purnky zhuix haq qoaq doi be hao?”
“Hef dekar zoix ee, biefnkorng ma be hao.”
“Ah mxkoiq laang hef phynar dekar zoix ee doi ue hao?”
Akofng: “Hef axsae qafng hiaq zue.”
“Iafbooi byloiar qafng hiaq zue doi be hao?”
Yn akofng doi korng: “A hef toantoaan-vii lax. Biefnkorng ma be hao!”
“Iafbooi danglooi vivii doi ue hao?”
Yn akofng korng: “Hef doi tih phaq ee lax.”
“Afbooi soysii tih phaq ee doi be hao?”
“Hef chiw hiaq zue a.” (Azor: Kofzar soysii ee auxpiaq u qafng, lorng ue pak soihar, qvoax~qylaai chinchviu u chiw kaxngqoarn.)
“Ah mxkoiq, hef viuar chiw hiaq zue doi ue hao?”
Yn akofng doi korng: “Hef axsae korng u six ky qaf.”
Sunar korng: “Ah, yar six ky qaf doi be hao?”
Yn akofng doi korng: “Aa, hef zhaa zhak ee lax.”
“Iafbooi, kor zhaa zhak ee doi ue hao?”
“Hef siangpeeng nng dex phoee a.”
“Iafbooi, phueuee nng dex phoee doi be hao?”
Akofng korng: “Hef taau ciamciafm a.”
“Afbooi kekafng taau ciamciafm doi ue hao?”
“Hef axsae nng ky qaf.”
(Zhuo zux Tviaf Akofng Kofngkor, Kafn Giogtofng korng, Doiq Zhengphoy piendux, Daioaan Gynbuun giefnkiux sia zhutparn.)
